Түркістан қаласында техникалық және кәсіптік білім беру ұйымдарының студенттері арасында «Еңбек кубогы» республикалық спартакиадасы салтанатты түрде басталды. Биылғы жарысқа Қазақстанның 20 өңірінен 2 мыңға жуық студент қатысуда. Спартакиаданың ашылуында ҚР Оқу-ағарту министрі Ғани Бейсембаев пен Түркістан облысының әкімі Нұралхан Көшеров қатысып, қатысушыларға сәттілік тілеп, алдағы жарыс елдің еңбекке деген жаңа көзқарасын қалыптастыруға, жастардың рухын көтеруге септігін тигізетінін атап өтті.
Ғани Бейсембаев өз сөзінде, Мемлекет басшысы жариялаған «Жұмысшы мамандықтар жылы» аясында ұйымдастырылып отырған бұл сайыстың маңызы ерекше екенін, техникалық және кәсіптік білім беру жүйесін жетілдіруге бағытталған көптеген жұмыстардың жалғасы екенін жеткізді. Өз кезегінде, облыс әкімі Нұралхан Көшеров Түркістанның еліміздің тарихи әрі мәдени орталығы ретінде аталған республикалық спартакиаданы қабылдауға лайықты екенін атап өтті. Ол өңірде техникалық және кәсіптік білім беру саласында жаңа жоспарлар мен бастамалардың қолға алынғанын, сондай-ақ аймақта жаңа жұмыс орындары ашылып жатқанын мәлімдеді. Жарыстың ашылу салтанаты жоғары деңгейде ұйымдастырылып, тарихи тұлғалар Әбу Насыр Әл-Фараби, Қожа Ахмет Ясауи, Ыбырай Алтынсарин және Қажымұқан Мұңайтпасұлының ескерткіштері мен бейнелері көрініс табылды. Патриоттық әндер шырқалып, іс-шараның мән-мағынасы артты.
Спартакиада бағдарламасына баскетбол, шағын футбол, футзал, тоғызқұмалақ, шахмат, үстел теннисі және волейбол спорттары енгізілген. Жарыс жеңімпаздары үшін арнайы сыйлықтар мен гранттар тағайындалады, бұл жастарды әрі қарай еңбекқорлыққа, адалдыққа тәрбиелеуге үлкен ықпал ететін болады.