«Жұмысшы мамандықтар жылы» аясында Түркістан қаласында колледж түлектеріне арналған «Адал азамат, адал еңбек, адал табыс» атты форум және бос жұмыс орындар жәрмеңкесі өтті.
Іс-шарада облыс әкімі Нұралхан Көшеров жұмысшы мамандықтардың беделін арттыру – маңызды міндет екенін атап өтті. Форум барысында 3 жақты меморандумдар жасалып, жастарға 1500-ден астам бос жұмыс орны ұсынылды.
Ірі кәсіпорындар қатарында «Kazakhstan Lihua», «PSI Mineral Technologies», «Altyn Land», «Kaz Eco Meat», «Silk Way International», «KazatomProm-SaUran» және тағы басқа мекемелер белсенділік танытып, жұмыс іздеушілерге түрлі мамандықтар бойынша бос орындар ұсынды. Ұсынылған бос орындардың 75%-ы өнеркәсіп саласына тиесілі болды.
Маңыздысы – бұл шараға «Түркістан Ахмет Ясауи» кәсіби колледжінің білім алушылары да белсене қатысып, өз мамандықтары бойынша жұмыс берушілермен сұхбаттасып, сұрақтарына жауап алды.
Жәрмеңке барысында жұмыс берушілер қоныс аударуға ниетті азаматтарға да қолдау шараларын таныстырып, түрлі әлеуметтік көмек түрлері туралы түсіндірме жүргізді.
Іс-шара өңір жастарын жұмыспен қамту және техникалық мамандықтарды дәріптеу бағытындағы нақты қадамдардың бірі болды.